Sábháilteacht agus Slándáil

Coireacht

Tá an ráta coiriúlachta i Vanuatú íseal ach tarlaíonn coiriúlacht. Méadaíonn na rioscaí tar éis thitim na hoíche, in áiteanna iargúlta agus má tá tú i d'aonar.

Molaimid duit réamhchúraimí bunúsacha a ghlacadh agus tú ag taisteal chuig Vanuatú:

• Ná bíodh do chárta creidmheasa, ticéid taistil agus airgead á n-iompar agat ag aon am amháin - fág airgead tirim breise agus earraí luachmhara in áit shábháilte.
• Tabhair aird ghéar ar shlándáil, cinntigh go bhfuil na doirse agus na fuinneoga go léir faoi ghlas san oíche agus fad is atá tú in áit eile, agus cinntigh go gcoinnítear earraí luachmhara in áit shábháilte shlán.
• Ná hiompar do phas murach go bhfuil géarghá leis agus fág cóip de do phas (agus cáipéisí taistil agus árachais) le do theaghlach nó le cairde sa bhaile.
• Seachain suimeanna móra airgid a thaispeáint go poiblí agus ná bain úsáid as Uathmheaisíní Bainc sa dorchadas, go háirithe má bhíonn tú i d’aonar. Seiceáil nach bhfuil aon duine do do leanúint agus tú i ndiaidh do chuid gnó a chur i gcrích.
• Coinnigh súil ghéar ar do chuid giuirléidí pearsanta agus coinnigh greim orthu in áiteanna poiblí.
• Seachain sráideanna agus staighrí dorcha gan soilse, agus déan socrú go mbaileofar agus go bhfágfar thú chomh gar agus is féidir do bhealach isteach d’óstáin nó d’árasáin

An Dúlra agus an Aeráid

Creathanna talún agus bolcáin

Tá Vanuatú suite i gcrios atá gníomhach go seismeach, rud a bhféadfadh creathanna talún agus gníomhaíocht bholcánach a bheith mar thoradh air, agus baol súnámaithe ag baint leis. Tá tuairiscí ar ghníomhaíocht bholcánach ar fud Vanuatú (agus aon rabhaidh reatha cioclóin nó súnámaí), ar fáil ó shuíomh gréasáin Roinn Meitéareolaíochta agus Geo-ghuaiseacha Vanuatú.  Is féidir le taistealaithe seiceáil freisin le ​hOifig Turasóireachta Vanuatú  nó le hOifig Chomhairle Cúige Tafea do Shliabh Yasur in Tanna.

Stoirmeacha trópaiceacha agus Cioclóin

Maireann séasúr na gcioclón ó Shamhain go hAibreán. Is féidir le stoirmeacha trópaiceacha agus cioclóin tarlú i míonna eile freisin. Is féidir leo cur isteach ar sheirbhísí riachtanacha, daoine a ghortú, damáiste a dhéanamh do réadmhaoin agus is féidir leo a bheith ina gcúis le bás daoine.

Leanann Vanuatú ag téarnamh ó thionchair Chioclóin Judy agus Kevin, a rinne damáiste forleathan. D'fhéadfadh go mbeadh cur isteach fós ar infreastruchtúr, ar sheirbhísí agus ar theileachumarsáid i roinnt áiteanna.

Tá ​córas foláirimh cioclóin dathchódaithe ag Oifig Náisiúnta Bainistíochta Tubaiste Vanuatúa chuimsíonn nósanna imeachta sábháilteachta le leanúint le linn cioclóin.​

LADTAI+ Taisteal

Níl coir déanta as caidreamh comhghnéis, ach ní ghlactar leo go forleathan go sóisialta. Moltar umhlaíocht agus discréid sa mhéid a chaitheann tú agus i do chuid iompair le cinntiú nach gcuirfidh tú isteach ar íogaireachtaí áitiúla.

Taisteal ar bhóithre

Is féidir le taisteal bóthair i Vanuatú a bheith contúirteach. Is minic a bhíonn drochbhail ar bhóithre agus bíonn siad neamhshoilsithe.

Is minic a shiúlann coisithe ar bhóithre agus is deacair iad a fheiceáil san oíche.

Dlíthe agus Gnásanna Áitiúla

Ná déan dearmad go mbeidh feidhm leis na dlíthe áitiúla ortsa mar chuairteoir, agus is fútsa a bheidh sé cloí leis na dlíthe sin. Bí ar an eolas agus léirigh meas ar ghnásanna, traidisiúin agus cleachtais áitiúla toisc go bhféadfaí a cheapadh go bhfuil d’iompar míchuí, naimhdeach nó mídhleathach fiú.

Sláinte

Fiafraigh de do dhochtúir i bhfad sula dtaistealaíonn tú an dteastaíonn aon vacsaíniú le haghaidh na tíre seo. Molaimid duit árachas taistil cuimsitheach a ghlacadh roimh thaisteal duit.

Má theastaíonn cúnamh leighis éigeandála uait le linn do thurais, cuireann Promedical seirbhís otharchairr (íoctha) 24 uair an chloig ar fáil i bPort Vila agus in Luganville trí scairt a chur ar 115. Ba cheart duit teagmháil a dhéanamh le do chuideachta árachais má theastaíonn seirbhís otharchairr uait nó má atreoraítear thú chuig saoráid leighis le haghaidh cóireála.

Tá saoráidí leighis i Vanuatú bunúsach. Tá roinnt clinicí leighis i bPort Vila, a thairgeann cúram príomhúil. Éileoidh cásanna níos tromchúisí aslonnú chun na hAstráile nó go dtí an Nua-Shéalainn.

Eolas Breise

Riachtanais iontrála (víosa/pas)

Ní mór do shealbhóirí an phas Éireannaigh na riachtanais seo a leanas a chomhlíonadh le go mbeidh siad in ann dul isteach i Vanuatú:

Pas a bheith acu atá bailí ar feadh sé (6) mhí ar a laghad tar éis an dáta imeachta atá beartaithe ó Vanuatú; Ní féidir paschártaí a úsáid.

Eiseofar Cead Cuairteora 30 lá do náisiúnaigh Éireannacha a chomhlíonann critéir iontrála nuair a shroichfidh siad Vanuatú.